THE REAL STORY OF WISETIME

 

Le grup musical Wisetime é gnü metü sö ti pröms mëisc dl’ann 2011 da dui jogn de Badia, che â bele da plü tëmp le dejidêr da mëte adöm n nü grup ‘cover’, por i dè indô vita a de vedles ćianties rock y oldies nia plü tan ascutades o inće jüdes a perde cun le passè di agn. “Guz” Gustav Mangutsch (bateria) y “Tepo” Stefan Piccolruaz (piano/synthetizer) à metü man da chirì musicisć interessá da sunè tla nöia ‘band’ y defata se à presentè Benno Canins al basso, ala chitara solista “Col/Sloody” Michael Palfrader, ala secunda chitara “Dave” David Kammerer y inultima “Föb” Fabian Pitscheider ala usc. Por en valgügn mëisc alalungia s’à i musicisć incuntè te local dles proes de Guz a porvè les ćianties, zënza avëi ćiamò dè n inom al grup nü, mo tan inant éra spo stada n bel domisdè pro na mësa al Badia Pub: al ê bel plan ora da se fà conësce al publich. Guz y Föb ô batié la band cun l’inom “Beca ai pîsc”, mo Benno y Tepo ne desmostra nia interès por chësc inom, insciö fej Guz na proposta nöia: “Wiseman”. Do avëi ejaminé te internet le significat dla parora ‘Wiseman’ éson stà a öna da lascè tomè inće chësc inom. Tepo, dër sodesfat dl’inom “Wise”, fej la proposta de ajuntè “time”. Düć é a öna, deache a chësta manira porta l’inom inće n significat: “tempo saggio”. Ai 19.06.2011 dales h16:45 nasc insciö l’inom “WISETIME”, che aparësc bele l’edema do sön le placat de n gran conzert, cun le logo elaborè da Guz. Le logo mostra n’ora che roda al inzescü, val’ numeri dl’ora é scrić plü grosc e ai manifestëia n significat. Dilan a Peter Alfreider (Pedro), che ti à proponü al nü grup musical n post sön paladina pro le Festival “Badia Music Days”, po i Wisetime se mostrè ala jënt por le pröm iade ai 30.07.2011. En chësta ocajiun à le grup presentè so repertore de musiga rock y dantadöt inće tröc oldies dai agn 80 ćina al dedaincö, rapresentan sciöche cover band deplü grups conesciüs a livel mondial (Dire Straits, Jet, Rolling Stones, C.C.R., Beatles y i.i.), cossa che plej dër ala jënt, dai plö jogn ai manco jogn. Le grup Wisetime é defata deventè bindebò conesciü tla Val Badia y i sis jogn à insciö tosc ciafè tröpes ofertes da sunè fora por locai desvalis y sön festes alaleria. Manuel Crazzolara y Terry Valentin mët impé n Fan-Club di Wisetime, che deura spo inće na plata te facebook, stampa malietes e depënj deplü placać. Mo nia dî n’à duré döt le bel, tosc é i Wisetime gnüs confrontà cun i pröms ostacui. Nia ma öna, mo bëgn döes denunzies se ciafa le grup por ‘volum massa alt’ y ‘schiamazzi notturni’, che por fortüna röia impò a bun fin. Le grup frësch y tres ćiamò motivé da jì inant se lascia indere tosc influenzè massa dal alcol ofrì dala jënt tratan i conzerć, cossa che comporta na gran confujiun sön paladina sciöche inće fai pro le sunè y stritaries tratan les rapresentaziuns musicales. Sciöche sce al ne bastass nia, tol ćiamò “Dave” la dezijiun da jì a rodè le monn, rovan spo tles Filipines, olache al s’à danter l’ater inamorè, maridè e olache al é spo insciö inće restè. “Col” ciafa n sostitut, Roberto, che sona ma por püch tëmp tla band. Al post de Roberto vëgnel a daidé fora por n pêr de mëisc Bruno Irsara, inće mëmber de n’atra band dl post. Le post de Bruno vëgn spo defata tut ite da n nü mëmber fis dla band, Luca Erlacher, mo intratan se chir “Col” n nü laur, y dal momënt che al é tres incërch fora por l’Europa, lascia “Col” i Wisetime. Döt va completamënter sotessura, la situaziun sciampa fora dles mans y le cört tëmp de vita di Wisetime manacia da jì a fin. Bruno, cun süa gran pasciun da sunè la chitara, vëgn indô zoruch a fà pert di Wisetime y Luca se impara ite te n cört tëmp döt le repertore dl grup sunè ti ultims agns. Le grup tëgn adüm, al nasc na nöia armonia y n gran spirit de grup. Bruno to la dezijiun de lascé y insciö ele Peter Verginer che tol so post. Cun so gran talënt n'adoral nia tröp tëmp da s'imparé ite le repertore. Atualmënter se presënta i Wisetime sciöche uniun de sis jogn che à na gran ligrëza da sunè y da ćiantè, por se devertì y dantadöt por devertì le publich, do avëi bele passè crusc y de vigni sort de morvëies y aventöres sön paladines tla Val Badia y foradecà.

Classic Rock/Rock/Oldies Cover band

© 2020 by Burchia Elvis for Wisetime

OFFICIAL LINKS

  • Facebook Clean
  • YouTube Clean
  • SoundCloud pulito